من حكايات الضاوية 1

سعاد عدنان

"غادي نمشي للمغرب و نتزوج إمرأة من مستوايا، تستاهلين و تقدرني.."

هادي هي الجملة لي خسر عليا الزوج ديالي ملي، صافي وصلت ليا للعضم و مبقيتش قادرة نسكت و قلت ليه الطلاق !! طبعا في الأول تخلع و تفاجأ، كيفاش المثقف و المناضل اليساري الكبير الدي يلمع في الخارج، تجي الضاوية لي عندها مستوى اعدادي و مكتكلمش الفرنسية مزيان و تقول ليه stop!!! ميمكنش impossible...طبعا انا مخديت هاد القرار حتى عييت و تهرست مبقاتش عندي لا كرامة لا وجود فقدت الاحترام حتى ديال راسي لراسي، تمسحت حتى في أصغر الأشياء المنزلية مكانش عندي الكلمة.

في أول الزواج، قلت ربما خاصنا نولفو بعضياتنا و كل شيء سيأتي، حيت متعارفناش بزاف، مباشرة من بعد ما حرگت لفرنسا تعرفت على بوعلام في إطار نشاط جمعوي مشيت ليه مع صديقة مشتركة بيننا، قدماتني ليه و قدماتو ليا و قضينا وقت زوين، كان رجل جد خلوق و prévenant، gentleman ،كلمات موزونة و في مكانها، احترام غير معقول،كان يكبرني بعشرة سنوات، تبهرت و عجبني بزاف منكدبش، تبادلنا أرقام الهواتف، و بدينا نتكلموا و نقضيو ساعات طويلة نتحاكاو و نتعاودو،عرفت عليه كلشي و عرف عليا كلشي و دازت الايام و عرض عليا الزواج....

"الضاوية،عجبتني بزاف، و انا كنقلب على بنت مغربية نكلموا انا و هي المشوار في جو جميل عامر بالحب و الاحترام، فكري مزيان و عطيني الجواب.. واذا مقبلتيش، انا مستاعد نتزوج بيك باش فقط تقادي وضعيتك و من بعد نتفارقوا...."

متيقتش راسي و حسدت راسي على الزهر لي جاني و بقيت نحاجي و نفك........تاصلت بالواليدة و حكيت ليها،نصحتني باش منفلتش هاد الفرصة الجميلة و نتزوج و نولد وليدات و نستقر.....

يتبع ........