المشكل أننا شعب حڭار و إقصائي، مسألة فصل التكوين عن الوظيفة بدات أولا عند الممرضين و بالضبط ف 2007 و كخطوة نضالية كانت مقاطعة مباريات التوظيف بالمستشفيات الجامعية اللي تلاها اعتصام آنذاك ديال خريجي معاهد التمريض و الطلبة و الممرضين فباب وزارة قلة الصحة.. اعتصام مفتوح تفرشخو فيه مزياان كل ليلة و دام لقرابة 39 يوما قاموا خلالها ببزااف د الأشكال النضالية بالموازاة مع الاعتصام و الحوارات المراطونية مع ياسمينة بادو و حتى جهة ما تضامنت معهم...
من وراها ف 2011 عاود خرجوا الممرضين بالآلاف فمسيرات و كان حراك كبير و احتقان فالوسط التمريضي مطالبة بشي أمور بديهية و بسيطة أبرزها هو الهيئة و القانون المنظم للمهنة (حيث خليوني نقول لكم أن داك الممرض اللي هو دينامو المستشفى راه غير محمي قانونيا فأي خدمة قدمها للمريض تقريبا، راه حتى باش يعبر للمريض الطانسيو ماعندوش الحق).. و عاود ثاني ما تضامن مع حد..
جات 2012 يا سيدي و يا لالة و جاب السي الوردي مرسوم غير قانوني يكرس للخوصصة القطاع و يرمي لادماج خريجي القطاع الخاص اللي كايتعتبرو تقنيين متخصصين فالوظيفة العمومية مع خريجي القطاع العمومي اللي كايتعتبرو مجازين من الدولة جنبا إلى جنب من خلال نفس الكونكور و بنفس الاطار، ضاربا عرض الحائط الاعداد الكبيرة ديال الممرضين العاطلين(و مايقولش ليا الخصاص حيث اذا بغيتي تسد الخصاص خاصك تزيد فالمناصب المالية ماشي فعدد المتبارين عليها)، مرسوم مجحف و نتج عليه حراك كبير وصل لمقاطعة الدروس و التداريب بجميع معاهد تكوين الممرضين العمومية فالمغرب كامل لمدة 3 أشهر و ووقفات و مسيرات احتجاجية و اعتصامات و حوارات و تفرشيخ.. و عاود ثاني ما هدر عليهم فالاعلام و ما تضامنت حتى جهة بل العكس.
2014 غاتعرف مقاطعة مرة أخرى للدروس و التداريب لمدة شهران متتاليان للمطالبة بادماج خريجي النظام القديم فنظام إجازة-ماستر-دكتوراه اللي كان نتيجة حراك 2012، هاد النظام اللي كايقصي الخريجين لحدود دفعة 2012/2015 من الاستفادة منه و بالتالي من الحق فأن الممرض يكمل قرايتو حيث قال لك ا سيدي مايمكنش يكون بأثر رجعي.. يعني دابا كاين ممرض عندو الاجازة فالتمريض و من حقو يكمل قرايتو فالماستر و الدكتوراه و كاين ممرض عندو دبلوم الدولة فالتمريض و ماشي من حقو يكمل قرايتو حيت ماعندوش المعادلة ديال الدبلوم بالاجازة بحالي أنا مسكينة)... و هادو بجوج قراو فنفس المعهد غير التسمية مختلفة و عند نفس الأساتذة و أكثر من ذلك الفئة الثانية قراو أكثر من الاولى فيما يخص ساعات الدروس النظرية و التطبيقة.. و فالاخير يجي السي الوردي و يقول لهم ماعندكمش الحق تكمل قرايتك (اه باش ما نساش الممرض هو الاطار الوحيد واقيلا فالمغرب اللي كايقرا 3 سنين و ماعندوش الاجازة و كايخدم بسلم 9).. عاود ثاني خلال هاد المقاطعة د شهرين اللي عرفت مسيرات و وقفات و اعتصامات و تفرشيخ ماتعطاتهاش حقها إعلاميا و حتى واحد ما تضامن حتى السي الوزير اللي ما حاشاهاش لينا أصلا هاد المرة..
2015 غايكون حراك قوي و مقاطعة للدروس و التداريب لازيد من شهر و وقفات و اعتصامات الخ الخ.. لانه تم السماح لخريجي مدارس التمريض الخاصة باجتياز مباراة الدولة (اطلع قرا الفوق و غاتفهم أننا ماشي ضد يدخلو للوظيفة العمومية لكن يدخلو بكونكور ديالهم مناسب للاطار باش كايتخرجو به) ثم القانون الداخلي للمعاهد العمومية اللي بنوده مجحفة فحق الطلبة الممرضين.. و مرة اخرى حتى واحد ما حاشاها ليهم..
و حاليا كاينة حركة خدامة للمطالبة بالمعادلة العلمية و الادارية باش نكملو قرايتنا و خارجة فمسيرة ف مارس و كاينين ممرضين عاطلين لازيد من سنتين خارجين نهار 4 فبراير فالرباط.. و كاينين بزاف د المشاكل اخرى كايعرفها القطاع..
شفتو علاش حنا حڭارة و إقصائيين و كانختارو معامن نتضامنو و معامن مانتضامنوش!! حيث الممرض بالنسبة لينا و لديك الصورة النمطية اللي واخذين عليه ماااشي هو السي الطبيب و السي الأستاذ، علما أن الدور ديالو فالمستشفى راه رئيسي و مايمكنش تمشي الأمور غير بالسي الطبيب بوحدو.. و علما ثاني أن الممرض ديال دابا ماشي هو الفرملي ديال واحد الحقبة زمنية، كاينين ممرضين كايوجدو الاجازة و الماستر و الدكتواه فأشياء أخرى ف لافاك حاليا و آخرين كرسوا وقتهم و جهدهم للعمل الجمعوي و خدمة المواطن بدون مقابل!!
خاصنا نعرفو أن الممرض حاليا فصراع و يتخبط لوحده باش يغير الصورة اللي واخذها المجتمع عليه و الظروف فاش كايزاول المهنة ديالو.. أجيو نعطيوه فرصة.. و شكرا
من صفحة سارة داوير الفايسبوكية